Hálfnaður með síðustu önnina

Var að enda við einn kúrsinn í skólanum sem endaði með kynningu á verkefni sem við erum búin að vera að vinna síðustu vikur. Þetta var reynda afar áhugavert efni sem gekk út á að taka út stöðu verkefnastjórnunar í kvikmyndaiðnaðinum. Það kom mér verulega á óvart hvað verkefnastjórnun er í raun þróuð í þeim geira og það var skemmtilegt og fróðlegt að fá að ræða við fólkið sem stjórna þessum ferlum.

Núna sit ég upp á bókasafni þar sem ég verð til 15.maí þegar ég á að skila lokaritgerðinni. Eins og viðeigandi er með lokaverkefni þá er maður auðvitað í tímahraki því það er erfitt að skilgreina gæði þess fyrirfram. Þess vegna er alltaf hægt að gera betur og ritgerðin verður eins góð og tíminn leyfir. Þessu hefur auðvitað fylgt kaffidrykkja í miklum mæli, óhollt mataræði utan heimilisins (þó ótrúlega lítið) og lítil samskipti við fjölskylduna og má nánast segja að maður sé í einangrun.

Konan mín leysti mig formlega frá heimilisstörfunum um daginn. Hún hefur stutt mig óendanlega mikið í þessum skóla en ekki fengið neitt annað en sífellda fyrirlestra um ágæti verkefnastjórnunar en þess utan fjarveru mína.

Þetta er þó að verða búið og þó að það séu komnir baugar undir augun þá er ekki nema rúmur mánuður eftir og þá verð ég frjáls og mastersgráðunni ríkari. Þetta er búið að vera erfitt en skemmtilegt og ég er farinn að glitta í ljósið í enda ganganna.

Athugasemdir

[Tinnhildur, 28.4.2008 kl. 21:04]

Þú felur baugana náttla bara með þessum sjúku sólgleraugum sem ég sá þig með í gær...

Gangi þér annars rosalega vel á lokasprettinum gamli - þú massar þetta eins og allt annað

[Steinn Hafliðason, 28.4.2008 kl. 21:13]

Þakka þér fyrir og sólgleraugun eru flott Annars mun ég slaka á í Finnlandi og Svíþjóð strax eftir síðasta prófið, koma við í sveitinni um miðjan júní og slaka á í París í lok júní. Eftir það verð ég orðinn svo ferskur og unglegur að það verður farið að biðja mig aftur um skilríki á skemmtistöðum

[Tinnhildur, 28.4.2008 kl. 22:06]

Við skulum nú ekki alveg tapa okkur í gleðinni Steinn minn

[Steinn Hafliðason, 28.4.2008 kl. 22:38]

Ég er með svo stíft prógram að slaka á að ég verð bara svolítið stressaður yfir því