ESB hefði ekki komið í veg fyrir núverandi vanda

Það má varla opna fjölmiðil án þess að tekið sé viðtal við einhvern sem vill í ESB. Þar er allt fallegt og fagurt, þar eru ekki vandamál og það afléttir allar okkar áhyggjur til framtíðar.

Ég er ekki sannfærður um að lífið sé svona einfalt að gera Ísland að fylki í evrópu eða ameríku leysi vanda okkar. Orsök okkar vandamála er ekki óheppni, tilviljun eða sjálfstæði þjóðarinnar. Bankarnir voru einfaldlega orðnir allt of stórir til að íslenski seðlabankinn gæti staðið á bakvið þá og þess vegna voru þeir staddir á brauðfótum. Þar á ofan eru bæði fyrirtæki og einstaklingar landsins almennt mjög skuldugir, miklu meira en eðlilegt getur talist. Þessi skuldsetning var notuð í neyslu og gerði íslendinga óhóflega viðkvæma fyrir efnahagsniðursveiflu. Ég sé ekki að það komi ESB neitt við að við vorum svona skuldsett. Það er bara kúltúrinn í þjóðfélaginu þó að ESB sinnar vilji halda öðru fram. Við hefðum lent í jafn miklum vandræðum innan ESB. Því til marks eru margar þjóðir innan ESB í miklum vanda bæði smáar þjóðir og stórar og er skemmst að minnast á frændur vora í Danmörku.

Það er mér til efs að við hefðum fengið mildari meðferð þó að við værum í ESB. Seðlabankar ESB og Bandaríkjanna vildu kenna íslendingum í eitt skipti fyrir öll að taka ábyrgð á eigin gjörðum og hvernig gott væri að haga fjármálum sínum. Hagsmunir seðlabanka ESB í þá áttina hefðu verið enn mikilvægari ef Ísland væri í ESB. Ekki vilja þeir hafa óráðssíufólk innan sambandsins. Þegar við þetta bætast svo kosningabarátta Brown og stórfelld mistök í efnahagsstjórn landsins þarf ekki lengur að kenna óheppni um vandamál okkar.

Sumir gætu sagt að ef við værum í ESB værum við ekki með krónuna. Vissulega væri gjaldmiðillinn ekki gjaldþrota og erlendu íbúðalánin hefðu ekki hækkað um 100% á einu ári. En þá hefði landið líka verið enn skuldugra því vextirnir hefðu áfram verið lágir þrátt fyrir ofneysluna og heimilin getað skuldsett sig meira. Það er nú þannig að fólkið skuldsetur sig þannig að það rétt geti borgað reikningana sína. Eins og félagi minn sagði, "þegar ég loksins sé ljósglætu í fjármálunum er ég fljótur að taka nýja raðgreiðslu til að slökkva ljósið". Ég held að þetta sé ómeðvitaður hugsunarháttur margra og kemur það í bakið á okkur núna og það er alveg óháð ESB. Verðtrygging er þáttur sem ég heyri líka varðandi ESB en verðtrygging er séríslenskt fyrirbæri. En við getum alveg sleppt verðtryggingu þó að við séum ekki í ESB. Ég veit ekki til þess að Kína, Sviss eða Noregur séu í ESB en samt er engin verðtrygging þar. Þetta er því einungis pólitísk ákvörðun hvort við höfum verðtryggingu eða ekki.

Þó að við göngum í ESB höldum við áfram efnahagslegu sjálfstæði okkar að hluta og ég sé ekki að við myndum læra mikla hagfræði við það eitt að ganga í ESB. Sumir hafa haldið því fram að það sé betra að láta þingmenn annara landa setja lög um ísland. Það er nú meiri uppgjafaþingmaðurinn sem gefur það í skyn og gjaldfellir þar með eigin trúverðugleika og dregur svo í efa eigið ágæti að hann ætti hið snarasta að hætta afskiptum af stjórnmálum því hann hefur lýst vantrausti á sjálfan sig.

Innan eða utan ESB, með sjálfstæðan eða utanaðkomandi gjaldmiðil höfum við sjálf komið okkur í þau vandræði sem við erum í. Ekki gjalmiðillinn sem slíkur, óheppni, tilviljun eða óvinveittir erlendir aðilar.

Endurtaki sig aldrei

Athugasemdir

[Gisli (IP-tala skráð) 24.10.2008 kl. 23:00]

Ertu alveg brjálaður Steinn að ætla kenna því um að Íslendingar hafi eitt um efni fram. Það er ekkert skrýtið að kaupa pulsu og kók fyrir 1000 kr. bara seta það á Visa og svo borga ég það bara með láni með 20% vöxtum plús verðbótum ekkert mál.

[Steinn Hafliðason, 24.10.2008 kl. 23:23]

Já það er einmitt málið. Hver króna sem þú eyðir umfram nauðsynjar s.s. mat og húsnæði en fer ekki í að borga niður skuldir ber þá vexti sem hæsta lánið sem þú ert með ber. Ef þú skuldar t.d. 100þús í yfirdrátt og borgar af því 20% vexti og notar svo pening til að kaupa þér örbylgjuofn í stað þess að borga yfirdráttarlánið er örbylgjuofninn í raun að bera þessa 20% vexti. Þá skiptir engu hvort þú ert með íbúðalán, yfirdrátt eða raðgreiðslu. Það sem þú kaupir umfram nauðsynjar og fer ekki í að borga vaxtahæsta lánið er í rauninni að bera þessa vexti því annars gætir þú sparað þá.

[Kristján Eldjárn Þorgeirsson, 5.11.2008 kl. 23:10]

Sæll Steinn!

Mikið hjartanlega er ég þér sammála í þessum pistli þínum.  ESB aðild hefði ekkert gert í þessum málum sem hér eru uppi.   Fyrir mér er ESB aðild ekki það sem málið snýst um núna heldur er það að reyna að ná tökum á því ástandi sem ríkir hér í landinu.  Ég er ekki einaðru stuðningsmaður ESB aðildar en ég vil þó að hver stjórnmálaflokkur, hér á landi, hefji skynsama en jafnfamt heiðarlega umræðu um þetta mál.  Það verður hver og einn að gera til að geta tekið vitræna afstöðu til málsins.  Þetta verkefni á að byrja í stjórnmálaflokkunum fyrst og fremst.