Gáta

Þú ert í beinni útsendingu í leik sem fer þannig fram:

Það eru þrjár hurðir á sviðinu. Bak við eina þeirra er nýr Ferrari en bakvið hinar tvær eru geitur. Þú mátt velja eina en þegar þú ert búinn að því verður þáttarstjórnandinn að opna aðra af hinum tveimur og hún verður að vera með geit. Þá mátt þú velja aftur og eiga það sem er á bakvið hurðina. Spurningin er hvað átt þú að gera þegar þáttastjórnandinn er búinn að opna hurðina með geitinni, velja sömu aftur eða skipta um og af hverju?

Athugasemdir

[Gulli (IP-tala skráð) 23.8.2007 kl. 21:21]

Ertu loksins farinn að trúa þessu ;)

Og hvað ef ég get ekki lagt saman, á ég þá ekki að fá að setja inn athugasemdir? Og hvað með alla sem kunna bara að "plúsa"?

[Steinn Hafliðason, 23.8.2007 kl. 21:55]

Já ég trúi. Lagðist yfir þetta í eitt skipti fyrir öll þegar tengdapabbi kom með þetta. Þú mátt þó ekki uppljóstra um svarið.

[Sigurjón, 25.8.2007 kl. 14:39]

Það á ekki að skipta.  Líkurnar breytast þegar þáttarstjórnandinn opnar dyrnar með geitinni.  Það má kalla þetta valkvæð líkindi.

Ef þú hafðir valið Ferrari-bílinn í fyrsta kasti, hafði stjórnandinn um 2 dyr að velja.  Hafðir þú hins vegar valið geitina, hafði hann aðeins um einar dyr að velja.  Það eru því 3 möguleikar fyrir hendi; ekki 2. 

[Guðjón Guðvarðarson, 26.8.2007 kl. 20:15]

Hverjir eru þeir Sigurjón?

[Sigurjón, 27.8.2007 kl. 19:07]

Setjum þetta niður lið fyrir lið:

Það eru 1/3 líkur að þú veljir bílinn í fyrsta kasti og þá hefur stjórnandinn um 2 dyr að velja.  Það eru 2/3 líkur að þú veljir aðra geitina í fyrsta og þá hefur stjórnandinn um eina dyr að velja.

Er ég á villigötum? 

[Sigurjón, 27.8.2007 kl. 19:25]

Ég sagði að það ætti ekki að skipta, en það var öfugt hjá mér.  Það á að skipta.

Málið er þannig vaxið:

Segjum að þú veljir dyr 1 og vinningurinn er þar.  Þá getur stjórnandinn valið 2 eða 3.  Ef þú skiptir, færð þú ekki vinning, en ef þú skiptir ekki, færðu vinning.

Ef vinningurinn er fyrir aftan dyr 2, getur stjórnandinn bara opnað dyr 3.  Ef þú skiptir, færðu vinning.  Ef þú skiptir ekki, færðu ekki vinning.

Ef vinningurinn er fyrir aftan dyr 3, getur stjórnandinn bara opnað dyr 2.  Ef þú skiptir, færðu vinning.  Ef þú skiptir ekki, færðu ekki vinning.

Í 2 tilvikum af 3 færðu vinning ef þú skiptir.  Það er því rétt að skipta. 

[Steinn Hafliðason, 27.8.2007 kl. 19:30]

Ég sé að þú hefur engu gleymt síðan við vorum saman í Gaggó Sigurjón, þú ert skyldur ætt þinni enda afburðamaður í greind.

[Guðjón Guðvarðarson, 27.8.2007 kl. 19:44]

Þetta hefur verið afburðabekkur Steinn

Mannst þú þennan með  spottana? 

[Steinn Hafliðason, 27.8.2007 kl. 20:45]

Nei ekki rekur mig minni í neina spotta en ef þú getur gefið mér vísbendingu rifjast það kannski upp.

[Guðjón Guðvarðarson, 28.8.2007 kl. 19:45]

Bíddu nú við...  Þú ert með tvo bandspotta sem brenna mishratt......... tímamælir.........reyni að rifja þetta upp næstu daga.

[Steinn Hafliðason, 28.8.2007 kl. 20:32]

Já mig rámar nú eitthvað í þessa gátu. Ég man nú ekki lengur hvernig hún er en ég held að mér hafi aldrei tekist að ráða hana.

[Sigurjón, 30.8.2007 kl. 00:15]

Þakka þér fyrir Steinn, þetta kemur allt með kalda vatninu...